NATO-nun Nizamnaməsinə görə bu təşkilata üzvlük üçün bütün müttəfiqlərin razılığı zəruridir.

Türkiyə prezidenti Rəcəp Tayyip Ərdoğan bu iki ölkəni terrorizmi dəstəkləməkdə ittiham edir. Ərdoğan bildirib ki, İsveç və Filandiya terroçu PKK -nın, habelə Fəthullah Gülənin rəhbərlik etdiyi FETO terror təşkilatının üzvlərini Ankaraya ekstradisiya etməkdən boyun qaçırır.

Ərdoğan mayın 19-da ritorikasını bir az da sərtləşdirib: "Biz razı ola bilmərik ki, Türkiyəyə sanksiyalar qoyan ölkələr NATO-ya qoşulsunlar. Onda NATO təhlükəsizlik təşkilatı yox, terrorçu təşkilat nümayəndələrinin toplandığı bir yer olardı”.

Beynəlxalq Təhqiqatlar Mərkəzinin direktoru, Odessa Milli Universiteti beynəlxalq əlaqələr kafedrasının müdiri Vladimir Dubovik “Azadlıq” radiosuna müsahibəsində deyib ki, bu məsələ Türkiyə üçün çox mühümdür: “Bu məsələlər Türkiyə üçün birmənalı şəkildə mühümdür. Amma biz inanmırıq ki, Türkiyə həqiqətən də İsveç və Finlandiyanın NATO-ya qoşulmasına maneçilik törədəcək. İnanırıq ki, bu məsələdə kompromis tapılacaq...”.

Ekspert hesab edir ki, PKK terror təşkilatı Türkiyə üçün son dərəcə həssas məsələdir: “Buna görə də Finlandiya və PKK-nı terrorçu təşkilat hesab etməməsinin özü Ankara üçün ağrılıdır...Digər tərəfdən İsveç və Finlandiya insan haqları məsələsinə çox həssas yanaşırlar. Bu iki ölkə həm də müəyyən silahların Türkiyəyə ixrac olunmaslına blok qoyub”.

Professor Dubovik bildirir ki, Ankaranın bu məsələdəki mövqeyini sərtləşdirən həm də elə ABŞ tərəfindən Türkiyəyə sanksiyaların qoyulmasıdır. ABŞ Türkiyə üzərinə sanksiyaları Ankaranın Rusiyadan S-400 raket sistemləri aldığına görə qoyub. Bundan başqa Türkiyə ABŞ-ın təkmil F-35 qırıcı təyyarələr proqramından çıxarılıb: “Odur ki, burda söhbət kompleks problemlərdən gedir və Ərdoğanbu problemləri həll etməyə çalışır. Ümid onadır ki, hər halda razılıq əldə olunacaq”.

Ekspert qeyd edir ki, hazırkı şəraitdə Türkiyə ilə münasibətlərin yaxşılaşdırılması ABŞ-ın maraqlarına xidmət edir. 

Onun fikrincə, Türkiyə NATO üçün son dərəcə mühüm müttəfiqdir: “Türkiyə 1936-cı il Montrö razılaşması əsasında Qara dənizdəki Bosfor və Dardanel boğazlarına nəzarət edir...Türklər öz tərəflərindən belə suallar verirlər: “Bəs siz niyə bizə kömək etmirsiniz? Bizim Suriyada problemimiz çıxanda siz niyə bizə kömək etmədiniz?”

Dubovik bildirir ki, bu məsələlərdə Türkiyənin öz inciklikləri, ABŞ-ın isə öz narahatlıqları var: “Hələki prezident Bayden Ərdoğanla münasibətləri məsələsi ilə yaxından məşğul olmur. Bu münasibətlərin, məsələn Obama ilə olduğu kimi pisləşəcəyini indidən demək olmur. Bəlkə də münasibətlər Ərdoğanın Trampla münasibətləri kimi yaxşılaşa bilər. Amma mən düşünürəm ki, Ankara Vaşinqtondan müəyyən pozitiv siqnallar gözləyir”.

Ekspert hesab edir ki, Türkiyənin İsveç və Finlandiyanın NATO-ya qoşulmaq istəyini bloklaması ilə bağlı problemin həlli bir neçə həftə çəkə bilər: “Düşünürəm ki, bu ölkələrin elitaları prosesin bloklanmasının heç kimin marağında olmadığını anlayırlar. Buna görə də zənnimcə imkan olduğu məqamlarda Türkiyəyə güzəştə gediləcək”.