Bunu Türkiyə Prezidenti Rəcəb Tayyib Ərdoğan Serbiyadan qayıdarkən jurnalistlərin İsrailin Suriyaya təhdid yaratması ilə bağlı suallarını cavablandırarkən deyib.

“İsrail regional və qlobal sülh üçün mövcud təhlükədir. Sülhün qorunmasını öz üzərinə götürənlər bu təhlükəyə son qoymalıdırlar. Suriyada vətəndaş müharibəsi başlayandan bəri Rusiyanın atdığı addımları diqqətlə izləyirik. Çünki Rusiya Suriya ilə birgə hərəkət edir. İran, Rusiya və Suriyanın üçtərəfli mexanizmi də birgə işləyir. Amma digər tərəfdən Amerika, İngiltərə və Almaniyadan ibarət koalisiya qüvvələri var. Onlar isə terror təşkilatı PKK və Xalq Müdafiə Qüvvələrinə (Suriya kürdlərinə) himayədarlıq edirlər. Rusiya, İran və Suriyanın buna qarşı daha təsirli tədbirlər görməsi mütləqdir. Bu vəziyyət Suriyanın ərazi bütövlüyü üçün ən böyük təhlükədir”, - deyə Ərdoğan bəyan edib.

Türkiyə Prezidenti həmçinin qeyd edib ki, PKK-ya kənar dəstək baxımından “İraqda da oxşar vəziyyət müşahidə olunur”.

“İsrailin müharibəni bütün regiona yaymaq səyləri, terror təşkilatlarının separatçı və dağıdıcı fəaliyyəti göz qabağındadır. Biz xırdaçılığı bir kənara qoyaraq, bölgəni birlikdə xilas etməliyik”, - Ərdoğan bildirib.

Ərdoğanın sözlərinə görə, İsrail Dəməşqi işğal edən kimi Suriyanın şimalında da olacaq.