Axşam.az xəbər verir ki, Pop divanın 1994-cü ildə işıq üzü görən "Bu dünya" mahnısı bu günlərdə ən çox video çəkilənlərdən olub. "İtkin gəlin" serialının soundtrəki olan bəstənin müəllifi Cavanşir Quliyevdir. Mahnının sözlərini isə Əlibala Hacızadə yazıb. Bu, Aygün Kazımovanın repertuarındakı ilk lirik mahnısıdır.

O, mahnını "Ömrüm-günüm" albomuna daxil edib. 

Bununla yanaşı Kazımovanın 1999-cu ildə oxuduğu "Tənha qadın" mahnısı da TikTok-da ən çox paylaşılanlar sırasında yer alıb. 

Qeyd edək ki, A.Kazımova müsahibələrindən birində "Bu dünya" mahnısını ilk vaxtlar ifa etmək istəmədiyini deyib. Cavanşir Quliyevin təkidi ilə daha sonra bəstəni oxuyub. Buna səbəb isə mahnının lirik olmasıdır. 

"Tənha qadın" mahnısını isə ilk dəfə Cavanşir Quliyev 1999-cu ildə 8 Mart günü Aygün Kazımovanın aparıcısı olduğu verilişdə ifa edib. Daha sonra Kazımova mahnını oxuyub və "Ah...!" adlı albomuna daxil edib. Aygün Kazımova mahnını reper Mone (Murad Quliyev) ilə 2001-ci ildə remiks şəklində yenidən təqdim edib. Mahnı Birinci Qarabağ müharibəsində həyat yoldaşı şəhid olmuş qadınlara həsr olunub. 

Xatırladaq ki, bundan əvvəl Kazımovanın "Vəfasızlar", "Qorxuram", "Səni belə sevmədilər" mahnıları, Namiq Qaraçuxurlu ilə oxuduğu duetləri də TikTok-da trend olmuşdu.