Musavat.com xəbər verir ki, məlumatı Türkiyənin “Ekonomim” qəzeti yayıb.

Qəzet bildirir ki, Türkiyə Maliyyə Nazirliyi yeni qərar layihəsi hazırlayır: “Layihəyə görə, 7 min türk lirəsi və daha yuxarı məbləğdə ödənişlər üçün debet və ya kredit kartlarından istifadənin məcburi olacağı və bu qaydanın vergi ödəyicisi olmayan şəxslərə də aid ediləcəyi nəzərdə tutulur”.

Yeni qaydanın pozulmasına görə alış məbləğinin 10 faizə qədər, ən azı 5 min lirə və ya 147,4 dollara qədər cərimə nəzərdə tutulur.

Rusiya Turoperatorları Assosiasiyasının (ATOR) vitse-prezidenti Artur Muradyan bildirib ki, yeni qayda rusiyalı turistlərin Türkiyədə etdikləri bahalı alışların sayının azalmasına səbəb ola bilər: "Bahalı alışların həcmi həqiqətən azala bilər, baxmayaraq ki, yeni normalar kəmiyyət baxımından Rusiya turist axınına təsir göstərməyəcək, lakin çox güman ki, orada daha az pul xərcləyəcəklər".

Bundan əlavə, ATOR bütün ailə üçün intensiv ekskursiyalara görə ödəmə ilə bağlı problemlərin ola biləcəyini ehtimal edir (onların qiyməti 200 dollardan çoxdur).