APA RİA Novosti-yə istinadən xəbər verir ki, bunu Gürcüstanın Baş naziri İrakli Kobaxidze deyib.

“Bu yaxınlarda iki terror aktı baş verib - biri Slovakiyada, ikincisi ABŞ-də. Bu qlobal siyasi qüvvələri xarakterizə edən ümumi imzadır”, - deyə Kobaxidze Dövlət Təhlükəsizlik Xidmətinin sui-qəsd cəhdi ilə bağlı araşdırmasını şərh edərkən bildirib.

O, Gürcüstanın Rusiya - Ukrayna müharibəsi ilə bağlı mövqeyinin bəzilərinin xoşuna gəlmədiyini deyib.

"Təəccüblü deyil ki, istintaqa görə, bütün bunlarda fiziki olaraq bu gün Ukraynada yaşayan əvvəlki hökumətin yüksək vəzifəli məmurlarının rolu görünür. Bu cür hərəkətlərin qarşısını almaq vacibdir və dövlət bunun üçün hər şeyi edəcək", - o deyib.

Xatırladaq ki, Gürcüstanın Dövlət Təhlükəsizlik Xidməti İvanişvilinin və "Gürcü Arzu"sunun bəzi rəhbər şəxslərinə qarşı sui-qəsdin hazırlanmasının araşdırıldığını elan edib. Kəşfiyyat xidmətinin məlumatına görə, bu plan Ukraynada yaşayan keçmiş gürcü məmurları tərəfindən təşkil edilib və maliyyələşdirilib.