"Report"un xəbərinə görə, Ombudsman Aparatının rəhbəri, Müstəqiı Daimi İnsan Hüquqları Komissiyasının üzvü Aydın Səfixanlı jurnalistlərə açıqlamasında deyib.

Onun sözlərinə görə, Ombudsmanın dəvəti əsasında nümayəndə heyəti Azərbaycanda xüsusi faktaraşdırıcı missiya həyata keçirəcək: "Missiyanın əsas istiqamətləri işğaldan azad olunmuş yerlərə baxış keçirmək, orada 30 il ərzində erməni işğalçıları tərəfindfən dağıdılmış məscidlər, sosial obyektlər, ümumiyyətlə, vaxtilə gözəl vəziyyətdə olmuş Azərbaycan şəhərllərinin indiki vəziyyətini görməkdir.

Daha sonra 44 günlük Vətən müharibəsi dövründə Azərbaycanın mülki əhalisinə qarşı Ermənistan tərəfindən törədilmiş cinayətlər yerində araşdırılacaq. Tərtər şəhərinə səfər planlaşdırılır. Orada qadağan olunmuş silahlardan açılan atəş nəticəsində mülki əhaliyə dəyən zərər yerində araşdırılacaq.

Daha sonra Gəncəyə səfər ediləcək. Azərbaycanın ikinci böyük şəhərinə atılmış raket zərbələrinin nəticələri yerində araşdırılacaq. Bütün dünya tərəfindən, beynəlxalq sənədlərlə qadağan olunmuş minaların basdırılması ilə bağlı pozuntular da yerində araşdırılacaq".

Aparat rəhbəri qeyd edib ki, sonda xüsusi hesabat hazırlanacaq: "Bu hesabat İƏT-in Xarici İşlər Nazirlərinin Şurasına da təqdim olunacaq. Təmsil etdiyim komissiyanın BMT-nin müqavilə qurumları ilə də çox sıx əlaqələri var. Bu hesabat həmin qurumların da diqqətinə çatdırılacaq".