Ölkənin futbol təsərrüfatında idarəçiliyi mərhələlərə bölsək, 1991-ci ildən 2003-cü ilə qədər olan ilkin dövr Azərbaycan Futbol Federasiyaları Assosiasiyasının (AFFA) qurucusu və ilk prezidenti Fuad Musayevin adı ilə bağlıdır. 80-ci illərdə “Neftçi”nin əsas himayədarı olan Musayevin bu posta gəlişi böyük mənada qanunauyğunluq hesab olunurdu. 

Azərbaycan futbolunun beynəlxalq arenaya çıxışı və ilk rəsmi matçdan etibarən, Avropanın qapazaltı komandalarından birinə çevrilməsi də Musayev dönəminin acı reallığıdır. Azərbaycanın 1995-ci ildə Fransaya 0–10 hesablı məğlubiyyəti məhz onun dövrünə düşür. 

Musayevin idarəçiliyinə gəldikdə isə onun AFFA-da real diktatura yaratdığı kimsəyə sirr deyildi. Bununla belə, Musayevin futbol anlayışı onun ən qatı əleyhdarları tərəfindən də inkar edilmirdi. Digər tərəfdən, Musayev dönəmində futbolun inkişafdan qalmasının əsas səbəblərindən biri dövlət-AFFA münasibətlərin qaydasında olmaması idi. 

Amma Fuad Musayevin AFFA-da hegemonluğunun başa çatdığı 2003-ci ildən artıq 18 il ötür. Futbolumuzda, xüsusilə, milli komandanın oyununda və göstərdiyi nəticələrdə dəyişən heç nə yoxdur. Burada mütləq qeyd olunmalıdır ki, 1991-2003-cü illər aralığından fərqli olaraq, futbola istər dövlət, istərsə də UEFA və FİFA xətti ilə külli miqdarda vəsait ayrılır. Amma nə fayda? Futbol ictimaiyyətinin üzünü güldürən yeganə məqam Qurban Qurbanovun gəlişindən sonra “Qarabağ”ın beynəlxalq turnirlərdəki uğurlu çıxışıdır. 

Nə qədər təəccüblü olsa da, ölkə futbolunda son 14 il 2007-ci ildə AFFA-nın baş katibi (indi icraçı vitse-prezident) Elxan Məmmədovun adı ilə assosiasiya olunur. Bəli, Assosiasiya prezidentinin yox, məhz onun adı ilə! Futbolla yaxından-uzaqdan əlaqəsi olmayan Məmmədovun AFFA-nın baş katibi postuna təyinatına dair suallar indiyə kimi cavabsız qalsa da, artıq öz aktuallığını itirib.  

28 yaşında indiki vəzifəsinə təyin olunan Elxan Məmmədov adının hallandığı korrupsiya ittihamlarının sayına görə bəlkə də tək-tük məmurla müqayisə oluna bilər. Həqiqətən, Məmmədovun suçlandığı ittihamları toplasaq, sanballı “kriminal buket” düzələr. 

Təsəvvür edin, Azərbaycan yığmasının oyunçularına qələbə və ya heç-heçə müqabilində verilməli olan pul mükafatının kəsilməsi, yaxud da həmin məbləğin bir hissəsinin sonradan geri istənməsi Elxan Məmmədovun “menecerlik dühası”nın məhsuludur. Həmçinin öz xidməti “fəaliyyəti” sayəsində ailə üzvlərinə və və ailəvi dostlara AFFA-nın kassasından para qazandırmaq təcrübəsinin də arxasında da bir başqası deyil, Məmmədovun özü dayanıb. Necə?

Baxın, Məmmədovun xarici qonaqlara hədiyyə etmək məqsədilə AFFA-nın pulu ilə aldığı müxtəlif rəsm əsərləri sizcə, hansı rəssam(lar)ın fırçasından ərsəyə gəlib? Atası, Xalq rəssamı Səlhab Məmmədovun və onun sənət dostlarının. Əlavə şərhə ehtiyac qalırmı? Lazımsız və əksəriyyəti kağız üzərində qalan, icra olunmayan “layihə”lərə ayrılan böyük pulların “silinməsi” də Məmmədovun AFFA-dakı fəaliyyətinin ayrılmaz hissəsidir. Bu barədə mediada saysız-hesabsız materiallar dərc olunub. 

Vaxtilə Azərbaycan çempionatında (indi təmtəraqlı Premyer-Liqa adı qoyulub) 12, 14, hətta 16 komanda mübarizə aparırdı və onların bir çoxu regionları təmsil edirdi. Məmmədovun futbolun məhvinə yönəlik fəaliyyəti sayəsində indi 4 dövrədən ibarət olan çempioantda cəmi 8 komanda yarışır. Onların içində yalnız “Qəbələ” Abşeron yarımadasına aid deyil. Yəni Gəncə, Tovuz, Şəmkir, Mingəçevir, Lənkəran və ənənələrə malik olan başqa rayonlarımız faktik futbolsuz qalıb. 

Amma Məmmədovun icraçı vitse-prezident olaraq, “şah əsər”i əlbəttə ki milli komandadır. Statistikaya baxsaq, Məmmədovun AFFA-ya gətirildiyi bu 14 ildə milli komandaya 8 (!) baş məşqçi təyin olunub. Onlardan 2-si yerli, 1-i əcnəbi olmaqla, həmin posta müvəqqəti təyin ediliblər. O cümlədən, 2017-ci ildə yığmaya baş məşqçi təyin olunan Qurban Qurbanov təqribən 1 il sonra istefa verib. 

Almaniyalı Beti Foqts, 2008-14 (nəticə: 21,13%)

Xorvatiyalı Robet Prosineçki, 2014-17 (26,09%)

Qurban Qurbanov, 2017-18 (33,33%)

Xorvatiyalı Nikola Yurçeviç, 2019-20 (10%)

İtaliyalı Canni de Byazi, 2020- (11,11%)

Buradan da göründüyü kimi, məşqçilik fəaliyyətində əcnəbi həmkarlarından daha yaxşı göstəriciyə malik olan Qurban Qurbanov məhz Elxan Məmmədovun ucuz intriqaları üzündən istefa verməyi daha məqbul saydı. 

Aşağı yaş qrupları üzrə milli komandaların nəticələri isə daha acınacaqlıdır. Bu da o deməkdir ki, yaxın gələcəkdə milli komandanın formasını geyməyə əsas namizəd olan həmin gənclər “məğlubiyyət estafeti”ni davam etdirəcəklər. Yəni Elxan Məmmədov fəaliyyətə başladığı 2007-ci ildən bu yana öz menecerlik bacarığını intriqa və korrupsiyaya deyil, futbolun inkişafına yönləndirsəydi, 14 il əvvəl top qovmağa başlayan uşaqlar indi əməlli-başlı futbolçu idilər…

Hə, gələk əsas suala: Adı uğursuzluq və korrupsiyanın sinoniminə çevrilmiş Elxan Məmmədov niyə hələ də öz postundadır? Adam İctimai Televiziyada (İTV) yayımlanan populyar “3 D” verilişinin qonağı olarkən dediklərindən belə anlaşıldı ki, o könüllü istefa vermək niyyətindən çox uzaqdır. Əlavə etdi ki, onu vəzifəsindən yalnız AFFA-nın İcraiyyə Komitəsi əvəz edə bilər. Yəni “cəsarətləri çatırsa, çıxarsınlar” tövrü ilə hər kəsə meydan oxumaqdan da çəkinmədi. 

Amma Azərbaycan futbolu elə bir arzuedilməz nöqtəyə çatıb ki, bundan o yanı yoxdur. Ölkədə futbolun mövcudluğunu və onun inkişafını istəyiriksə, Elxan Məmmədov bu sahədən uzaqlaşdırılmalıdır. Əks halda, bu “keşiş Qapon” futbolumuzu hələ çox gülləbaran etdirəcək…

Mənbə:Qlobal.net