Yeniavaz.com xəbər verir ki, Dövlət Statistika Komitəsi müşahidə olunan mənzərəyə baxmayaraq Bakıda əhali sayının kəskin artmadığını açıqlayıb.

Statistika Komitəsi 2009-cu ildə Bakıda əhalinin sayının 2 milyon 45,8 min nəfər, 2022-ci ildə isə 2 milyon 303,1 min nəfər olduğunu açıqlayıb. Bu isə o deməkdir ki, son 13 ildə Bakıda əhalinin sayı 257,3 min nəfər və ya 12,5% artıb. Bu həm də o deməkdir ki, son 13 ildə rayonlarda yaşayan əhalinin sayı Bakı əhalisinin sayından daha çox artıb. Belə ki, 2009-cu illə müqayisədə 2022-ci ildə Azərbaycan əhalisinin ümumi sayı 1 milyon 234 min nəfər və ya 13,8% artaraq 10 milyon 156,4 min nəfərə yüksəlib.

Statistika Komitəsinin açıqladığı başqa bir maraqlı və eyni zamanda ziddiyyətli göstərici əhalinin xərcləmələriylə bağlıdır.

Komitənin məlumatına görə bu ilin yanvar-fevral aylarında Azərbaycan əhalisi pərakəndə ticarət şəbəkəsində 8,2 milyard manat pul xərcləyib və pulun yarıdan çoxu – 59%-i (4,8 milyard manat) paytaxt Bakıda xərclənib.

Əgər rəsmi statistikaya görə ölkə əhalisinin 23%-i Bakıda yaşayırsa, o zaman paytaxt əhalisinin xərclədiyi vəsait də təxminən bu səviyyələrdə olmalı idi. Amma göründüyü kimi, arada 2 dəfədən çox fərq var.

Pərakəndə ticarət şəbəkəsində xərclənən pulların yarıdan çoxu (59%-i) Bakının payına düşürsə bu həm də onu göstərir ki, ölkə əhalisinin təxminən yarısı Bakıda məskunlaşıb.