Peşə təhsili ixtisas təsnifatında bir sıra ixtisaslar var ki, bugünkü əmək bazarında onlara ehtiyac yoxdur. Bu ixtisaslar təsnifatdan çıxarılacaq.

Xezerxeber.az-ın məlumatına görə, bunu Peşə Təhsili üzrə Dövlət Agentliyi direktorunun müavini Simnar Mamedov deyib.

Agentlik rəsmisi bildirib ki, peşə təhsili sistemi əmək bazarının tələblərinə digər təhsil pillələrindən daha çevik, daha tez reaksiya verir. Buna görə də bu il 9 yeni ixtisas üzrə tələbə qəbulu həyata keçiriləcək.

Onun sözlərinə görə, yeni ixtisasların yaradılması ilə bağlı işlər həyata keçirilərkən işəgötürənlərin tələbləri, ehtiyacları əsas amil kimi götürülür. Bu məqsədlə əmək bazarında aparılan araşdırmalar, eyni zamanda, ölkənin növbəti 5-10 ildə iqtisadi inkişaf prioritetləri nəzərə alınaraq, yeni ixtisaslar təqdim edilir.

Qeyd edək ki, peşə təhsili müəssisələrinə qəbul avqustun 12-nə kimi "portal.edu.az" saytı vasitəsilə aparılacaq.