Bizim.Media bu günə qədər Milli Məclisdə təmsil olunmuş incəsənət adamlarını araşdırıb.

Parlamentdə ən çox təmsil olunmuş sənət adamı, dünya şöhrətli müğənni, Xalq artisti Zeynəb Xanlarovadır. O, ümumilikdə, beş dəfə seçicilərinin rəğbətini qazanaraq 24 il deputat olub. Xalq artisti yalnız VI çağırış üzrə parlament seçkilərində namizədliyini irəli sürməyib.

Xalq şairi, Vətəndaş Həmrəyliyi Partiyasının sədri Sabir Rüstəmxanlı da stajlı deputatlardandır. O, I, II, III, IV və VI çağırış parlament seçkilərində qələbə qazanaraq parlamentdə təmsil olunur. Hal-hazıra Milli Məclisin yeganə incəsənət xadimi hesab oluna bilər.

Mərhum Xalq yazıçısı, rejissor və dramaturq Maqsud İbrahimbəyov 1995, 2000 və 2005-ci illərdə seçicilərinin etimadını qazanmağı bacarıb.

Mərhum Xalq şairi Vaqif Səmədoğlu II və III çağırış üzrə Milli Məclisin deputatı seçilib.

Mərhum Xalq yazıçısı Yusif Səmədoğlu 1995-ci ildə Milli Məclisin deputatı seçilib. Lakin o, 1998-ci ildə dünyasını dəyişdiyi üçün 5 illik müddətini sona çatdıra bilməyib.

1995 və 2000-ci illərdə keçirilən seçkilərdə qələbə qazanan mərhum Xalq şairi Bəxtiyar Vahabzadə də Milli Məclisdə təmsil olunmuş ədəbiyyat xadimləri sırasındadır.

Mərhum Xalq şairi Zəlimxan Yaqub da Bəxtiyar Vahabzadə kimi, 1995 və 2000-ci illərdə seçicilərinin etimadını qazanaraq parlamentə düşməyi bacarıb.

Bakı Şən və Hazırcavablar Klubunun mərhum prezidenti Anar Məmmədxanov da birinci, ikinci və üçüncü çağırış Milli Məclisin deputatı seçilib.

Azərbaycan Yazıçılar Birliyinin sədri, Xalq yazıçısı Anar I və II çağırış dönəmlərində deputat olub.

Xalq artisti, mərhum aktrisa Amaliya Pənahova1995-ci ildə I çağırış Milli Məclisdə deputat mandatını qazanmağa nail olub.

Azərbaycan Rəssamlıq Akademiyasının rektoru, məşhur heykəltəraş və xalq rəssamı Ömər Eldarov birinci çağırış Milli Məclisin deputatı olub.

Mərhum Xalq şairi Ömər Eldarov və Amaliya Pənahova kimi 1995-ci ildə mandat qazananlar arasındadır.

Mərhum Xalq artisti, aktyor Mikayıl Mirzə də birinci çağırış Milli Məclisə deputat seçilib. İkinci dəfə isə 2002-ci ildə əlavə seçki yolu ilə millət vəkili olub.

Siyahıdan da göründüyü kimi, incəsənət xadimlərimizin ən çox mandat aldığı parlament məhz I çağırış olub. 1995-ci ildə keçirilən seçkilərdə siyahıda adları çəkilən 12 nəfər seçicilərin etimadını qazana bilib.