Bunu “Report”un Ankara bürosuna təhlükəsizlik üzrə türkiyəli ekspert Abdullah Ağar bildirib.

O deyib ki, FETÖ terror təşkilatıdır: “Bu şəbəkə Türkiyədə vaxtilə çox önəmli yerlərə nüfuz etdi. Ölkəmizi 350 milyard dollar zərərə məruz qoydu. Təşkilat hazırda da himayə edilir, onun gizli kripto-fəaliyyəti davam etdirdiklərini bilirik”.

Ekspert vurğulayıb ki, FETÖ Azərbaycanda da son dərəcə təsirli və güclü olmağa cəhd edib: “Onlara qarşı Türkiyə və Azərbaycan birlikdə əməkdaşlıq etdi və bu əməkdaşlıq davam edir. Amma Türkiyədə olduğu kimi, Azərbaycanda da FETÖ tərəfdarları hələ də var”.

A.Ağarın fikrincə, FETÖ həm də İslam dinini nüfuzdan salmaq üçün hazırlanmış bir layihədir: “Bu təşkilatın “mülayim islam”, “dinlərarası, mədəniyyətlərarası dialoq” kimi anlayışlarla bərabər, həm də İslam dinini nüfuzdan salmaq kimi bir təməl fəaliyyəti mövcuddur. “Mülayim İslam, imperial güc” layihələrini həyata keçirmək üçün var-qüvvələri ilə fəaliyyətlərini davam etdirməyə çalışırlar. Bu layihənin bütün İslam dünyasında - Orta Asiyada, Balkanlarda, Afrikada qlobal güclərə xidmət etdiyini görürük. Odur ki, FETÖ təşkilatının nüfuz etdiyi bütün ölkələr bu şəbəkəyə qarşı birgə əməkdaşlıq əsasında mübarizə apararlarsa, bu, daha faydalı olar".