Əsasən şəhərin mərkəzi hissələrindəki hündürmərtəbəli binalarda olan bu evlərin kirayə qiyməti dodaq uçuqladır. 

 

Yernisabah.az xəbər verir ki, bu gün paytaxtda hətta 11-14 minə bina evləri kirayə verilir.

 

Belə evlərin yeri, mərkəzə yaxınlaşdıqca, təmirinə çəkilən xərc artdıqca qiyməti də artır. 

 

Hazırda bazarda təklif edilən ən bahalı mənzil Səbail rayonundadır. Dəniz mənzərəli 8 otaqlı, 664 kvadrat metrlik lüks mənzil aylıq 14 min manata təklif olunur. Funikulyor və Xalça Muzeyinin yaxınlığında yerləşən bina 24 saat mühafizə olunur. Kirayəşinə pulsuz avto dayanacaq və dəniz panoraması vəd edilir. Dubleks mənzil təmirlidir və mebellərlə tam təchiz olunub.

 

Aylıq 11 min manata təklif edilən ev isə Şah İsmayıl Xətai metrostansiyası yaxınlığında yerləşir. 468 kvadrat metrlik mənzil 20 mərtəbəli binanın 14-cü mərtəbəsində yerləşir. Mənzil ən lüks mebellərlə təchiz olunub. Vasitəçi 6 otaqlı evin qiymətini bahalı mebellərlə əlaqələndirib. 

 

Siyahıda üçüncü sıranı 10 600 manata təklif olunan İçərişəhərdəki mənzil tutur.

 

Prezident Administrasiyası binası, Nazirlər Kabineti və Gülüstan sarayının yaxınlığında yerləşən yaşayış binası unikal yerləşməsi və füsunkar xarici görkəmi ilə əcnəbi qonaqlar, səfirlik əməkdaşları və diplomatik nümayəndələrə kirayə verilməsi məqsədilə inşa edilib.

 

Bina 9 mərtəbədən ibarətdir və  mənzil  yüksək zövqlə dizayn edilərək dəbdəbəli həyat tərzinə uyğunlaşdırılıb. Binadan dəniz kənarına və Alov Qüllələrinə gözəl panoram görüntüsü açılır. 

 

Paytaxtda 8 500 manata da mənzil təklif edilir. Mənzil “Port Baku”  elit yaşayış kompleksində yerləşir.

 

Mənzildə nəfis interyeri olan 6 otaq, mebel və məişət texnikası var. 30 mərtəbəli binanın 20-ci mərtəbəsində yerləşən mənzili kirayələşən şəxs idman zalı, hovuz və restoranlara çıxış əldə edir.

 

Ev sahibi sənədləşmə, avtomobil icarəsi, təmizlik işlərində lazımi köməkliyi göstərəcəyini vəd edib.