"Fichajes": "Mançester Yunayted" "Atletiko Madrid"in qapıçısı Yan Oblaka ilə maraqlanır. "Qırmızı şeytanlar" keçidi yanvarda reallaşdırmaq fikrindədir. Yan ilə yanaşı İngiltərə klubu sağ cinah müdafiəçisi də axtarışındadır. 

Qeyd edək ki, komandanın əsas qapıçısı David De Xeanın müqaviləsi gələn yay başa çatır. Ancaq "Mançester Yunayted"in onunla sözləşmənin müddətini daha 1 il artırmaq niyyətindədir. 

"SPORT": "Barselona" "Arsenal"ın hücumçusu Qabriel Martinellini heyətinə cəlb etmək istəyir. La Liqa təmsilçisi Braziliya millisinin 21 yaşlı üzvünə gələn ilin yayında təklif göndərməyi planlaşdırır. 

Martinellinin "topçular" ilə müqaviləsi 2024-cü ildə başa çatacaq.  Ancaq futbolçu daha əvvəl verdiyi açıqlamada karyerasını "Arsenal"da davam etdirmək istədiyini bildirmişdi. 

İnsayder Nikolo Skira: "Atletiko Madrid" İngiltərə Premyer Liqasında pulsuz ala biləcəyi futbolçu tapıb. Söhbət "Lester"in müdafiəçisi Çağlar Söyüncüdən gedir. Futbolçunun klubu ilə müqaviləsi mövsümün sonunda başa çatır. Tərəflər yeni sözləşmə üçün razılığa gələ bilmədilər. "Atletiko Madrid" və "Roma" isə bu durumdan istifadə etmək niyyətindədirlər. 

Xatırladaq ki, 26 yaşlı futbolçu "Lester"ə 2018-ci ildə "Frayburq"dan 21 milyon avro qarşılığında keçib. 

"A Bola": "Liverpul" "Benfika"nın istedadlı futbolçusu Antonio Silvanı transfer etmək niyyətindədir. Komandasında zədəlilər səbəbilə problem yaşayan baş məşqçi Yürgen Klopp klub rəhbərliyindən keçidi tezləşdirməyi xahiş edib. "Benfika"nın 19 yaşlı vunderkind üçün "Liverpul"dan  60 milyon avro tələb edəcəyi bildirilir.