Bunu Moderator.az-a açıqlamasında tanınmış ictimai xadim, Tibb Universitetinin dosenti Rəşid Mahmudov deyib. O, rüşvətin aradan götürülməsinin vacib olduğunu bildirib:

“Hər adamı vəzifəyə təyin etməzlər. Bu adam təmizdirsə, safdırsa, ona etibar etmək olar. Dövlətin hüquq-mühafizə orqanları, Dövlət Təhlükəsizlik Xidməti var və onlar yaxşı bilirlər hansı məmur necə işləyir. Bu istiqamətdə iş aparılarsa, ölkə düzələcək. Söhbət ondan gedir ki, məmurlar pullarını qutulara yığıb saxlayırlar və pul dövr etmir. Bizim büdcəmiz illərdir ki, artmır, belə şey olmaz axı. Pul dövriyyəyə getmirsə, dövətin inkişafı olmur. Bir çox məmurlar pullarını xaricə daşıyırlar və orda banklara qoyurlar”.

“Bu işdə jurnalistlərimizin də üzərinə böyük məsuliyyət düşür. Açığını deyim ki, bir çoxu qorxur, satılıb, pulunu alıb tərif yazır. Ölkəni düzəltmək üçün jurnalistin yazdıqları da əsas rol oynamalıdır”.

“Müharibəyə gedib əlini-ayağını itirən qazilərimizi incidirlər. Onlar da intihara cəhd edirlər, məmurların özbaşınalığından bezirlər. Bu isə düz deyil. Bütün bunların hamısını da dövlətin üstünə yıxmaq olmaz. Bizim cəmiyyətimiz düzəlməlidir. O həbs edilən icra başçılarına desən ki, yığdığın sərvətlərdən qaziyə kömək et, etməyəcək. Bizim imkanlı iş adamlarımız var ki, milyardlarla pulları var, məşuqələrinə hər şey edirlər, amma qaziyə kömək edən yoxdur. Bu insanlar bizə görə vuruşub, qan töküb, bizim onlara can, qan borcumuz var və bunu ödəmək lazımdır. Mənə elə gəlir ki, iş adamlarımız da şəhid və qazi ailələrimizə kömək etməlidir. Sanki bunu qəsdən edirlər ki, insanlarımız dövlətdən narazı qalsın”.

“Dövlətimiz uşaqpulu verməlidir. Uşaq sağlam yesə, qidalansa, yaxşı olar. O, sabahın əsgəridir. Müharibəyə gedənlər də kasıb ailələrin övladları idi. Hər bir yerdə şəhid ailələrimizi, qazilərimizi əziz tutmalıyıq. Bütün bunları dövlət edəcəksə, onda yerlərə təyin olunan məmurlar nə üçündür?! Onlar bilməlidirlər ki, özlərinin və ailələrinin yaşamasını təmin edən bizim o əsgərlərimiz idi”.