AzFakt.com “Azadlıq” radiosuna istinadən xəbər verir ki, Milli Allergiya və Yoluxucu Xəstəliklər İnstitutunun direktoru Anthoni Fauci deyib ki, yoluxma və ölüm hallarında artım bir çox ştatların yoluxmaların azalmasını gözləmədən biznesləri açması, evdə qalmaq göstərişlərini yüngülləşdirməsindən sonraya təsadüf edir.

“Çox çətin və problemli dövr yaşayırıq”, – Fauci “The Hill” media orqanının təşkil etdiyi telekonfransda deyib və bir çox ştatların orta göstəriciləri aşdığını vurğulayıb.

Hazırda 50 ştatın 41-də yoluxmalar sürətlə artmaqdadır. Əhali sayı yüksək Kaliforniya, Texas və Florida ən çox ziyan görənlər sırasındadır. Artıq xəstəxanalar dolub və bir çox ştatlar təkrar açılım qərarlarını geri götürürlər.Fauci deyib ki, yoluxmaların güclü olduğu ştatlar açılım prosesini davam etdirməməlidirlər. Ancaq o, tam karantinə də çağırmayıb.

İyulun 9-da Birləşmiş Ştatlarda bir günə rekord göstərici – 65 min yoluxma qeydə alınıb. İndiyədək ölkədə 3,1 milyon yoluxma təsdiqlənib, 133 mindən çox xəstə dünyasını dəyişib.

Prezident Donald Tramp bir daha qeyd edib ki, yoluxmaların artması testlərin genişləndirilməsi ilə bağlıdır. Prezident tvitində yazıb ki, digər ölkələrlə müqayisədə indi ABŞ-da daha böyük və daha yaxşı testlər gerçəkləşdirilir.