AzFakt.com Virtualaz.org-a istinadən qeyd edir ki, Patruşev prezident Vladimir Putin və xarici işlər naziri Sergey Lavrovdan sonra Rusiyanın xarici siyasətində söz sahibi olan üçüncü şəxs hesab edilir. Bu baxımdan onun Yerevana səfəri regionda cərəyan edən son proseslər fonunda diqqəti cəlb etməyə bilməz.

Belə ki, Ermənistanın baş naziri Nikol Paşinyanın və onun hərbi-təhlükəsizlik sferası üzrə məsul nazirlərinin bir-birinin ardınca səsləndirdiyi avantürist bəyanatlar Qarabağda yeni, irimiqyaslı hərbi əməliyyatlar riskini kəskin artırır. Hərçənd hazırda təmas xəttində nisbi sakitlik hökm sürməkdədir, bununla belə bu sakitlik həm də tufanqabağı vəziyyəti xatırlada bilər. Çünki Paşinyanın avantürist bəyanatları danışıqlar üçün praktiki olaraq heç bir şans buraxmır və Bakını yeganə çıxış yoluna-hərbi əməliyyatlara vadar edə bilər.

Bəlli olduğu kimi Paşinyan elə hakimiyyətə gələn kimi danışıqları pozmağa yönəlmiş avantürist bəyanatlar seriyasına başlayıb. Əvvəlcə o, Dağlıq Qarabağın adından danışıqlar aparmaq mandatına sahib olmadığını bəyan etməklə xeyli müddət danışıqlar prosesi ətrafında əsəbi atmosferin yaranmasna səbəb oldu. Daha sonra hər halda danışıqlar aparmağa razılaşsa da çox keçmədən növbəti avantürist addımlarla atmosferi korlamaqda davam etdi. Məsələn, Paşinyanın yaxın tərəfdaşı-xüsusi xidmət strukturunun rəhbəri Artur Vanetsyan işğal altındakı Füzuli rayonuna səfər edib bildirdi ki, Arazboyu ərazilərin geri qaytarılmasından söhbət gedə bilməz. Əksinə, Ermənistan bu əraziləri məskunlaşdıracaq.

Yaxud müdafiə naziri David Tonoyanın Nyu-Yorkda amerikalı ermənilər qarşısında verdiyi lovğa bəyanatlar. Tonoyan deyirdi ki, ərazilərin qaytarılması barədə heç bir söhbət gedə bilməz, əksinə, Ermənistan yeni ərazilər tutmaq üçün müharibə başlaya bilər.

Nəhayət bu günlərdə Ermənistan hökumətinin Qarabağa Arazboyu ərazilərdən keçməklə üçüncü yolun çəkilməsi layihəsini elan etməsi, ardınca Paşinyanın Xankəndində “miatsum” (“birləşmə”) şüarını səsləndirib Qarabağı Ermənistan ərazisi elan etməsi əsəbləri tamamilə tarıma çəkib. Belə vəziyyət kifayət qədər təhlükəlidir və nəinki danışıqlar prosesi üçün şans buraxmır, eyni zamanda müharibənin hər an alovlanmasına gətirib çıxara bilər.