Dəniz təhlükəsizliyi mövzusu üzrə ixtisaslaşmış “Dryad Global” portalının yazdığına görə, insident ötən gün oktyabrın 25-də baş verib. Bildirilir ki, “MSC Lucia” konteynerdaşıyan gəmisi Nigeriyanın Qvineya körfəzindəki iri neft terminalı Aqbamidən 86 dəniz mili məsafədə quldurların hücumuna məruz qalıb. Hücuma məruz qalan gəmiyə Rusiya donanmasının “Vitse-admiral Kulakov” gəmisi köməyə gedib.

“Saat 13 radələrində Rusiya gəmisi  Toqo respublikasından Kameruna gedən “Lucia” konteynerdaşıyanından SOS siqnalı alıb. Gəminin sürətli katerlərlə hərəkət edən naməlum silahlılar tərəfindən ələ keçirilməsi cəhdi haqda xəbər verilib”, - Rusiya Müdafiə Nazirliyinin mətbuat xidməti bu insidentlə bağlı bildirir.

Gəmiyə hücum edən piratlar

Köməyə gedən Rusiya gəmisindən göyərtəsində dəniz piyadaları olan  Ka-27PS vertolyotu havaya qaldırılıb. Vertolyot yaxınlaşanda quldurlar gəmini tərk ediblər və tam sürətlə sahilə doğru üzüblər. Vertolyotun nəzarət uçuşundan sonra hərbi gəmi konteynerdaşıyana yaxınlaşıb, göyərtəyə antiterror qrupu çıxarılıb. Hərbçilər gəmiyə baxış keçiriblər və heyət üzvlərini maşın zalından çıxarıblar.

Qvineya körfəzində dəniz quldurlarının ticarət gəmilərinə hücumları tez-tez baş verir. Bu bölgə mülki gəmilər üçün ən təhlükəli marşrutlar siyahısındadır.