AzFakt.com xəbər verir ki, qadınların mübarizəsində Ermənistan, kişilərin yarışında isə Sloveniya yığması məğlub edilib. Qadınların görüşündə Günay Məmmədzadənin birinci lövhədə Lilit Mkrtçyan üzərində qələbəsi həlledici olub. Qalan şahmatçılar heç-heçə etdiklərindən 2,5:1,5 hesablı nəticə qeydə alınıb. 

Bununla da qadınlardan ibarət Azərbaycan millisi 27 ildən sonra ilk dəfə Avropa çempionatının medalçıları sırasına düşüb. Yalnız Rusiya və Gürcüstandan geri qalan yığma 3-cü yeri tutub. 

Kişilərdən ibarət yığma isə Sloveniyaya 3:1 hesabı ilə qalib gəlib. Komanda üzvlərindən qələbəni Rauf Məmmədovla Qədir Hüseynov 2-3-cü lövhələrdə əldə ediblər.  

Avropa çempionatı

IX tur

Kişilər

Luka Leniç - Arkadi Naydiç 0,5:0,5

Matey Sebenik - Rauf Məmmədov 0:1

Yure Skoberne - Qədir Hüseynov 0:1

Yan Sudel - Eltac Səfərli 0,5:0,5

Günay Məmmədzadə - Lilit Mkrtçyan 1:0

Xanım Balacayeva - Elina Danielyan 0,5:0,5

Ülviyyə Fətəliyeva - Mariya Gevorqyan 0,5:0,5

Gülnar Məmmədova - Anna Sarqsyan 0,5:0,5 

Qeyd edək Azərbaycanın qadın millisi indiyədək ən böyük nailiyyətinə 1992-ci ildə imza atıb. Həmin vaxt da bürünc medal qazanılıb. Kişilərdən ibarət yığma isə üç dəfə - 2009, 2013 və 2017-ci illərdə Avropa çempionu adını qazanıb, 2011-ci ildə gümüş, 2007-ci ildə isə bürünc medala layiq görülüb.