Bu fikirləri AZƏRTAC-a açıqlamasında Bakı Dövlət Universitetinin (BDU) dosenti Atamoğlan Məmmədli söyləyib.

BDU-nun dosenti bildirib ki, iki ölkə arasında əməkdaşlıq yüksələn xətlə inkişaf edir. Bu əməkdaşlıq siyasi, iqtisadi-ticari, mədəni və hərbi əlaqələrin daha da inkişafına səbəb olub. Bu sahədə dövlət və hökumət başçılarının qarşılıqlı səfərləri də mühüm əhəmiyyət kəsb edir. Bu mənada iyulun 11-də Azərbaycan Respublikasının Prezidenti İlham Əliyevin Pakistan İslam Respublikasına dövlət səfəri mühüm bir addım oldu.

Səfər zamanı Azərbaycan Prezidentini Pakistanın Baş naziri Məhəmməd Şahbaz Şərif qarşıladı. İslamabadda Azərbaycan və Pakistan rəhbərləri arasında məhdud və geniş tərkibdə görüşlər keçirildi. Bu iki ölkəni “bir qəlbdə döyünən iki ürək” adlandıran Baş nazir bütün məsələlərdə Pakistan və Azərbaycanın bir-birinin yanında olduğunu vurğuladı. Qarabağ və Kəşmir məsələsində tərəflərin həmişə bir-birini dəstəkləməsi qeyd olundu.

“Pakistan tərəfi, həmçinin COP29-a ev sahibliyi edəcək Azərbaycanın bu sahədə fəaliyyətini dəstəklədiyini bildirib. Bu münasibətlə noyabr ayında Pakistanın Baş nazirinin Azərbaycana səfəri nəzərdə tutulub. Yüksək səviyyəli görüş zamanı iki ölkə arasında həyatın müxtəlif sahələrində əməkdaşlığa dair çoxsaylı sənədlər imzalandı. Bütün bunlar tezliklə iki ölkə arasında ticarət və investisiya qoyuluşu sahəsində işlərin həcmini 2 milyard dollara çatdırmağa imkan verəcək. Həmçinin Bakı-İslamabad, Bakı-Kəraçi, Bakı-Lahor hava xətti üzrə təyyarələrin uçuşları məsələsi müzakirə olundu. İslamabadın abadlaşdırılması ilə bağlı azərbaycanlı ekspertlərin hazırladığı planın da tezliklə həyata keçirilməsi nəzərdə tutulur. Tərəflər əməkdaşlığın səviyyəsini yüksəltmək üçün daha çox imkanların mövcud olduğunu vurğuladılar. Bəzi sənədlərin isə noyabrda Bakıda imzalanması nəzərdə tutulur. Bütün bunlar göstərir ki, Azərbaycan-Pakistan münasibətləri bu ilin sonunda yeni mərhələyə qədəm qoyacaq”, - deyə dosent Atamoğlan Məmmədli fikrini yekunlaşdırıb.