Fanat.Az xəbər verir ki, tam adı Maykon Duqlas Sisenando olan futbolçu Braziliyanın "Villa Nova" klubundan İtaliyanın 4-cü liqa təmsilçisi "Sona Kalsio"ya keçib. Bununla da o, 15 yaşlı oğlu Felipe ilə komanda yoldaşı olub.

Transferi rəsmiləşəndən sonra açıqlama verən Maykon "Oğlumla İtaliyaya döndüyüm üçün xoşbəxtəm. Bir futbolçu olaraq yeni məcəraya başlayacağım üçün həyacanlanıram" deyib.

Qeyd edək ki, 2001-ci ildə vətənində "Kruzeyro" klubundan peşəkar karyerasına başlayan Maykon indiyədək Fransada "Monako", İtaliyada "İnter", "Roma", İngiltərədə "Mançester Siti", Braziliyada "Avay", "Krikiuma" və "Villa Nova" klublarında çıxış edib. 

Sağ cinah müdafiəçisi "Kruzeyro" ilə Braziliya çempionluğunu və kubokunu, "İnter"lə İtaliya çempionluğunu (4 dəfə), kubokunu (2), Super Kubokunu (3), Çempionlar Liqasını (1) və klublararası dünya çempionluğunu (1) qazanıb.

2003-2014-cü illərdə 76 dəfə Braziliya millisinin formasını geyinən futbolçu 7 qola imza atıb. Maykon millinin heyətində 2 dəfə Amerika Kubokunun, 2 dəfə FIFA Konfederasiyalar Kubokunun qalibi olub.